Sistemang Pang-edukasyon

Oo, naging makatotohanan ang isyu sa sistemang pang-edukasyon mula sa kuwento at sa panahon ngayon. Hindi maitatanggi na hanggang ngayo'y mayroon pa ring mga gurong nagtuturo ng asignaturang malayo sa kaniyang natapos dahil na rin sa kakulangan ng mga guro lalo na sa pampublikong paaralan.  

Kahit na ang isyung ito ay matagal nang nangyayari, hindi pa rin ito tuluyang nawawala hanggang sa kasalukuyang panahon. Sa aking palagay, maaaring walang masyadong batas na tumutugon sa isyung ito. Kapag walang batas para sa isyung ito, magpapatuloy ang mga gurong abusado sa pang-iinsulto sa mga mag-aaral, maghihirap ang mga estudyante, hindi mawawala ang paboritismo ng mga guro, at iba pa. Kawawa ang mga guro at mga mag-aaral, lalo na ang mga nais na makapagtapos at makapagtrabaho.

Makikita sa nobelang El Filibusterismo ang mga paghihirap na napagdaanan ng ating mga ninuno mula sa kamay ng mga Kastila. Mapupukaw ang ating pagmamahal sa bansa at sa ating kapwa dahil sa nobelang ito. Dito natin maaalala na kailangang baguhin ang mga bagay na may hindi magandang dulot sa ating bansa. Kailangan nating masolusyonan ang mga isyung hanggang ngayo'y nabubuhay pa na makikita sa nobelang El Filibusterismo. Isa pa, kabilang na sa ating kasaysayan ang nobelang ito dahil sa nilalaman nitong tungkol sa nangyayari sa ating bansa noon. Marami tayong matututunan at maaaring matutunan din ng susunod na henerasyon.